१५ अप्रिल सिड्नी।
अष्ट्रेलिया सरकारले इमिग्रेसन सम्बन्धि अधिकारिहरुलाई इमिग्रेसन क्लियरेन्समै भिसा रद्द गर्न सक्ने समेतको अधिकार दिएको संगै अष्ट्रेलिया आउदा आफुले ल्याउने सामानमा धेरै ध्यान दिनु पर्ने भएको छ ।
अष्ट्रेलिया आउने व्यक्तिले खानेकुरा ल्याउँदा समेत वातावरणमैत्री र स्वस्थ हुनुपर्छ । यदि खानेकुरा वातावरणमैत्री छैन भने इमिग्रेसन क्लियरेन्समै भिसा रद्द हुन सक्नेछ । अप्रिल १७ देखि यो नियम लागु हुने बताइएको छ ।
यस नियम अनुसार, अब अष्ट्रेलिया आउँदा आफूले ल्याएको सामान बारे इमिग्रेसन क्लियरेन्समा प्रष्ट बताउन नसकेमा र त्यो यहाँको नियम भन्दा विपरित भएमा इमिग्रेसन क्लियरेन्सका अधिकारिहरुले नै कारबाही अगाडी बढाउनेछन् । यस्तो अवस्थामा अधिकारिहरुले पोइन्ट कम गरिदिने, भिसा रद्द गरिदिने या तीन वर्ष पछि मात्र अष्ट्रेलियाको भिसा दिने भन्ने निर्णय दिनेछन् ।
भारतकी निकिता नाम गरेकी विद्यार्थीले आफ्नो झोलामा कुखुराको मासुको अचार ल्याएकी थिइन् । डिक्लेरेसन फारम भर्न समेत उनी अलमल परिन् । त्यहाँका अधिकारीहरुले उनको झोला र संगै फारम जांच गर्न थाले र त्यही समयमा उक्त कुखुराको मासुको अचार भेटे । त्यसपछि निकितालाई त्यहीं एयरपोर्टमै सोधपुछ भयो । पछि त्यहाँका अधिकारिहरुले बायो सेक्रुटरी जाँच गरेपछि मात्र उनलाई जान दिएका थिए ।
अब लागु हुने नयाँ नियममा यस किसिमका समस्याले भिषालाई असर गर्ने देखिन्छ । त्यसैले अष्ट्रेलिया ल्याउँदा आफूले ल्याउने सामान र यहाँको नियम सम्बन्धि प्रष्ट जानकार हुनु राम्रो हुनेछ ।
