काठमाडौँ ,
प्रधनमन्त्री केपी शर्मा ओलीले देशमा राजतन्त्रको खाँचो छ भन्नेहरुलाई मुर्खता नदेखाउन आग्रह गरेका छन् । शुक्रबार भक्तपुरमा आयोजित ‘प्रधानमन्त्री रोजगार कार्यक्रम’ को शुभारम्भ गर्दै प्रधानमन्त्री ओलीले २ सय ४० वर्ष शासन गरेर मुलुकलाई अन्धकारको युगमा धकेल्ने, गरिव बनाउने राजतन्त्र फेरी चाहियो भन्नेहरुलाई मुर्खको संज्ञा दिएका हुन् ।
ओलीले नेत्र विक्रम चन्द “विप्लव” नेतृत्वको नेकपालाई तथाकथित क्रान्तिको नाममा हिंसा भड्काउने प्रयास नगर्न चेतावनी दिँदै देश र जनतालाई माया गरेर इमान्दारिताका साथ राष्ट्र निर्माणको अभियानमा सहभागी हुन आग्रह गरेका थिए ।
सरकार शान्ति, सुरक्षा, सुशासन र विकासको काममा लागि परेको प्रधानमन्त्री ओलीको भनाई थियो । उनले देशलाई प्रतिगमनतर्फ लैजाने चेष्टा नगर्न पनि सम्बन्धित पक्षलाई सचेत गराएका थिए ।
